ActivityLatest NewsLPU Student's Blog

PISTA PARA SA WIKANG FILIPINO!

by: George Relucio

 

Pinagbuklod ng isang makulay na pista ang mga mag-aaral, guro at kawani ng Lyceum of the Philippines-Laguna sa taunang pagdiriwang ng Buwan ng Wika na may temang WIKANG KATUTUBO: Tungo sa Isang Bansang Filipino noong ika-29 ng Agosto, taong kasalukuyan.

 

Nagtagisan ng galing ang mga mag-aaral sa iba’t ibang patimpalak tulad ng pagsayaw, pag-awit, pagguhit ng poster, paggawa ng slogan at pagsulat ng sanaysay. Ipinamalas din ng iba’t ibang kolehiyo ang kanilang husay sa paggawa ng booth at galing sa Laro ng Lahi.

 

Sa patimpalak ng pagsayaw, itinanghal ng iba’t ibang grupo ng mag-aaral ang mga katutubong sayaw ng Pilipinas. Kinilalang pinakamahusay na grupo ang ITTM 2-1 na sumayaw ng Singkil, isang katutubong sayaw ng mga Maranao. Nakakuha sila ng markang 84.33%. Ikalawang pinakamahusay ang ITTM 2-2 (79.33%) na nagtanghal ng Kuratsa at ikatlo naman ang CLOCA 2-1 (78.33%) na inindak ang sayaw sa bangko.

 

Katutubong Sayaw. Iniuwi ng ITTM 2-1 ang pinakamataas na parangal sa Patimpalak ng Pagsayaw.

 

 

Ayon sa isang miyembro ng ITTM 2-1, Napili naming ang singkil dahil nagandahan kami nang napanood namin ang ganitong uri ng sayaw. Masaya at excited din kaming sayawin ito dahil ito ay masasabing bago sa mga patimpalak.”

 

Awit ng Puso. Ipinamalas ni Melody Villanueva ang kanyang talento sa pagkanta. Siya ang itinanghal na panalo sa Patimpalak ng Pagkanta.

 

 

Iginawad ang pinakamataas na parangal kay Melody Villanueva mula sa Kolehiyo ng Sining at Agaham sa paligsahan ng pag-awit, 94% ang kaniyang naging puntos. Nasa ikalawang pwesto naman si Nikki Redondo (89.67%) at ikatlo si Darla Montalbo (88%). Sa panayam kay Villanueva, alam niya ang kahalagahan ng disiplina sa ensayo para manalo sa laban. Mas mahirap ang pagkanta ng OPM. Madaling marinig kapag nagkaroon ng sintunado”, saad ni Villanueva.LA

Ang Maharlika. Ipinamalas ng mga kalahok sa Lakan at Lakambini ang kanilang husay at talino noong sumagot sila sa mga tanong ng hurado. Sina Ivan Libang at Elleona Hernandez ang itinanghal na Lakna at Lakambini 2019.

 

Ipinutong naman ang korona kina Ivan Libang at Elleona Hernandez ng Kolehiyo ng Sining at Agham nang tinanghal silang Lakan at Lakambini 2019. Kinilala ng dalawa ang tulong at suporta ng buong departamento sa kanilang pagkapanalo.

Itinampok ng Kolehiyo ng Pandaigdigang Turismo at Pamamahala ng Mabuting Pakikitungo ang sinaunang kusinang Pilipino. Naghain din sila ng mga pagkaing mula sa iba’t ibang rehiyon sa Pilipinas. Ito ang naging susi para igawad sa kanila ang Pinakamagandang Booth. Binigyan sila ng kabuuang marka na 91%. Pagpapamalas daw ito ng katangian ng kanilang kolehiyo na kilala sa pagiging innovative”. Kolehiyo ng Sining at Agham ang nasa ikalawang pwesto na may kabuuang marka na 86.67% at Kolehiyo ng Inhenyeriya at Pag-aaral sa Kompyuter ang ikatlong parangal sa markang 60.67%.

 

Ipinarating ni Ive Marie Manlapig ang kanyang mensahe sa pamamagitan ng malikhaing pagguhit. Itinanghal siyang may pinakamagandang poster sa markang 98.33%. Ang grupo naman nina Reizil Nolaso, Paolo Chavez, Jules Ovilla, Jesse Fortaleza at Mark Lester Tala-tala ang may ikalawang pinakamagandang poster na nakakuha ng 94.67% na marka. Iniuwi naman nina Aala, Baybay, Dela Cruz at Latrina ang parangal na ikatlong pinakamagandang poster na may 92.67 na marka.

Iniuwi naman ni Wellaine Malabuyoc ang parangal na pinakamahusay sa paggawa ng slogan. Sinundan siya ni Trisha Monique Mondares na nasa ikalawang pwesto at ni Arlie Marie Castillo na nasa ikatlong pwesto.

Si Hannah Carelle naman ang nanalong pinkamahusay sa pagsulat ng sanaysay. Pumangalawa naman si Derrick Raven Barrion at pangatlo si Ma. Richelle Anne Laude.

 

Ipinakita naman ng Kolehiyo ng Negosyo at Pagtutuos ang kanilang galing nang manalo sila sa Laro ng Lahi. Pangalawang pwesto ang Kolehiyo ng Sining at Agham at pangatlo ang Kolehiyo ng Pandaigdigang Turismo at Pamamahala ng Mabuting Pakikitungo.

Layunin ng pagdiriwang na ipaalala sa bawat Lycean ang kahalagahan ng Wikang Filipino dahil ang bansang walang pagmamahal sa sariling wika ay isang lahing walang pagkakakilanlan. — JPS

 

Buwan ng Wika 2019

Nakisaya ang Lyceum of the Philippines University – Laguna sa pagdiriwang ng buwan ng wikang pambansa.Tunghayan natin ang mga di malilimutang pangyayari na hatid sa inyo ng #TeamLYMMACS#BuwanNgWika2019Photo: James Veluz Lj Napawit Roma Aleksandra Thea Angela Dela Rosa KL Fajilagot II Eileen MangalindanVideo: Marvin Mangurit King Singson Jc Vicente John Glen Amante Gian Aloysius Paolo BatinoEditor: Jerome Dela RosaColorist: King Singson

Posted by Lyceum Multimedia Arts Creative Society on Thursday, August 29, 2019

Leave a Reply

Your email address will not be published. Required fields are marked *

Post comment